Zabava

Pješačka grupa, koju predvodi naš sugrađanin Slobodan Drašković, ponovo je aktivna.

Minulog vikenda, ljubitelji prirode, njih ukupno 22-oje imali su, kako nam je rekao “divnu turu u rejonu Luštice, Radovića, Radovanića, Eraka i Brgula”.

“Vremenska prognoza je bila dobra, ali se nije realizovala, a u zadnjoj uri pješačenja počela je kiša.
Rekosmo, ako bi Englezi čekali na sunce, ne bi iz kuće izlazili.
I nije nam pokvarila raspoloženje, koje je stvorilo lijepo druženje i prekrasna priroda odnosno razne varijante zelene boje prošarane cvjetovima maginje i ostataka plodova nara i rogača.
Energija ovih divnih ljudi sa kojima pješačim, daje mi podstreka da istrajem na organizaciji ovih naših planinskih tura.
Lijepo je čut i vidjet, da u ovom našem turbulentnom svijetu, ima i mjesta gdje zrači pozitivna energija.
A meni je bilo posebno lijepo čuti, kada je mala petogodišnja Lina, učesnica ture, na pitanje, kako joj je bilo, odgovorila:
Divno!!!
Poslije ovih Lininih riječi, ne želim da dodam ništa, ni manje ni više”, saopštio je Drašković za Radio Kotor.