Kultura

Međunarodna izložba “Jadransko i jonsko brodovlje u novom vijeku (1650.-1850.)”, biće otvorena danas u Pomorskom muzeju, u Pesaru (Italija).
U pripremi ove izložbe jedini predstavnik Crne Gore bio je Pomorski muzej Crne Gore-Kotor tj. kustos Pomorsko-tehničke zbirke Ilija Mlinarević.
Izložba je nastala analizom oko 20.000 dokumenata iz osamnaestog vijeka, zapisa o ulascima i izlascima iz luka, spisa u mornarskim školama ili bratovštinama, registracija mornara, vlasnika i kapetana, pisama konzula, zapisa o brodolomima, koje je prikupio hrvatski naučnik Nikola Čolak (1914 –1996.) u nizu izdanja Hrvatskih pomorskih regesta 18. stoljeća, sv. I–IV.
Autorka Zrinka Podhraški Čizmek analizirala je preko 25.000 spomena brodova iz dokumenata, podijelila ih i razvrstala po različitim nazivima, dodatno obogativši istraživanja konsultacijskom platformom sa italijanskim, hrvatskim, crnogorskim i grčkim pomorskim naučnicima i stručnjacima.
Ovaj zahtjevan poduhvat, uz temeljno istraživanje ikonografije, omogućio je slikovito rekonstruisanje 62 plovila zahvaljujući umjetničkom talentu Luigija Divarija, stručnjaka za istoriju pomorstva.
Plan je da izložba putuje tokom 2025. i 2026. godine počevši od Zagreba, gdje će Hrvatski povijesni muzej izvesti izložbu u četvorojezičnom formatu, na razne dogovorene lokacije: Krk, Cupra Marittima, Trst, Pula, Rijeka, Bakar, Lošinj, Split, Korčula, Dubrovnik, Kotor, Atina i Zadar.
Gostovanje ove izložbe u Kotoru planirano je tokom 2025. godine.

JU Pomorski muzej Crne Gore