Kultura

Peraštani vjekovima organizuju različite pučke fešte, a kićenje "Mađa" se posebno obilježava svakog 1. maja, kao pozdrav proljeću.

Prema tradiciji, mještani su jutros na trgu ispred crkve Svetog Nikole, okitili stablo mladog brijesta flašicama mlijeka, vina, koromanima i raznobojnim trakama.

Ispred organizatora NVO Društvo prijatelja grada Perasta, prisutne je pozdravio Andro Radulović.

,,Podizanje Mađa u Perastu predstavlja jednu od tri fešte, koje obilježavamo svake godine. Ovo je najstariji običaj u Perastu, često kažemo i da je paganski, koji se obilježavao na cijelom Jadranu, međutim, od svih mjesta Perast ga jedini još uvijek baštini, na što smo veoma ponosni. Tradicija kaže da posljednji mladoženja iz Perasta treba da ode u šumu, posječe stablo duba ili hrasta i donese ga noć radnije, neposredno prije podizanja, djevojka iz Perasta ga kite sa raznobojnim trakicama koje obilježavaju pozdrav proljeću, kao i flašicama vina, mlijeka i koromanima koji simbolišu blagostanje, koje uvijek i postojalo u Perastu“, navodi Radulović.

Uslijedio je obilazak Perasta u pratnji klape “Castel Nuovo“ i tradicionalno posluženje, uz koromane i bijelu kafu u restoranu “Đardin”.  

Mađ će na Pjaci Svetog Nikole ostati do 14. maja, kada će ga, u susret Zavjetnom danu Peraštana, mještani ukloniti.

Tekst i foto: Tamara Vuković