Kultura

Veče nostalgije i smijeha, “Finili su Mare bali” održano je sinoć pred punom dvoranom u crkvi Sv. Duha.

U programu su učestvovali Dubravka Jovanović, Dolores Bonić Fabian i Berislav Bećo Latković koji su kroz razgovor, šalu i čitanje odlomaka iz novog lista „Batoć“, čije su urednice Jovanović i Bonić Fabian, bar nakratko vratili prisutne u vrijeme kada se, kako su istakli, „građanski živjelo“, a riječ imala težinu i šarm.

U svom prepoznatljivom maniru osvrnuli su se i na savremene izazove i trendove, nasmijavši publiku, ali i podsjetivši na sve one koji su ostavili trag u kulturnom i društvenom životu grada.

Poseban ton večeri dala je Bruna Lončarević koja je ponosno i nostalgično govorila o duhu nekadašnjeg Kotora.

„Finili su Mare bali. Ili nas je pregazilo vrijeme ili zaboravljamo neke lijepe stvari, istinske vrijednosti grada u kome se građanski živjelo, a tradicija i naš kotorski govor njegovali se i  izgleda, ostaju samo u nekom kantunu naših sjećanja. Zato ove dvije Kotoranke uporno i samostalno rade, bez ičije pomoći, a kamoli novaca, jer mnogi misle da to ne zaslužuju. Zato što, valjda pričaju nekakvim zastarjelim riječima koje niko ne razumije. Pa neka i ne razumije, jer nismo mi otišli, mi smo ostali, a oni su došli’’, istakla je u svom govoru.

Objasnila je i simboliku „Batoća“ i značaj lista „Karampana“ za identitet Kotora.

,,Pa kad Batoć sa Karampane potegnemo, neka najprije iscuri šporka voda, a onda poteče bistra i razbistri nam pamćenje. Ili onaj batoć što je na satu od Svetoga Tripuna i staroga sata, neka nas dobro udari u glavu da se osvijestimo, da ne zaboravimo ko smo, odakle smo i gdje pripadamo. Ove dvije fetive Kotoranke, znaju nas i osjećaju nas. Znaju kakve su nam mrvice po špagovima, ali znaju i te naše špagove napuniti osjećajem, ljubavlju i ponosom, jer smo svi mi u duši djeca ovoga Kotora, na pločnicima pijaca, u društvu golubova i zvonika, palača, zidina i čiste vode Karampane“, nostalgično je kazala Lončarević.

U nastavku obraćanja osvrnula se i na značaj jubileja i ulogu urednica Dubravke Jovanović i Dolores Bonić Fabian u očuvanju tradicije.

„Večeras duo Dubravka i Dolores, njegujući tradiciju i kotorske vrijednosti, a u čast jubileja, sto godina od izlaska prve Karampane, u ove karnevalske ure podsjećaju nas na stare dane. Našim kotorskim govorom, šalama i nostalgijom žele nas vratiti u vrijeme koje lagano prolazi. Dok duvaju neki novi vjetrovi, dok neki novi ljudi donose novo vrijeme, nove običaje i regule, ostaje u nama žal za tim vremenima kad smo se družili, ćakulali, balali. Vrijeme od plesa, od đita, od maskenbala, abruma i karnevala. Vrijeme Karampane koja se čekala i čitala, koja je svojim duhom otkrivala male i velike tajne – duhovito i sa stilom, a bez ljutnje i bez smutnje. Prošlo je sto godina od prve Karampane, koja je zaslužila mnogo više poštovanja nego što je dobila’’, naglasila je Lončarević u svom govoru.

Veče su upotpunile klape „Gašler“, „Maris“ i „Škuribanda“, izvodeći lokalne numere koje je publika pjevala zajedno s njima i nagrađivala ih gromoglasnim aplauzima.

Program „Finili su Mare bali“ bio je omaž listu „Karampana“, njenom stogodišnjem trajanju i svemu onome što Kotor čini Kotorom - jezik, humor, tradicija i ponos koji se, uprkos svemu, ne predaje.

Mihaela Moškov