Ekonomija

Pijačni dan u Risnu protiče uobičajeno, a kako se može vidjeti na fotografijama koje smo zabilježili jutros, ponuda ni ove nedjelje nije izostala, uprkos kiši.

U ponudi su različite vrste sireva, čije se cijene kreću od 8 eura po kilogramu, dok kilogram kajmaka košta 16 eura. Masline se prodaju po cijeni od 7 eura, dok je za litru domaćeg maslinovog ulja potrebno izdvojiti 13 eura. Cijena meda iznosi 18 eura, dok se litar domaćeg soka može kupiti po cijeni od 7 eura. Krompir se prodaje po cijeni od 1 do 1,5 eura po kilogramu, cvekla je 2,5 eura, česan 8 eura, kilogram kupusa, poriluka, rotkvice i zelene salate košta 2 eura, paradajz je 3, a krastavac 2,5 eura. 

Kilogram blitve je 2 eura, veza mladog luka i rukole je 1 euro, žućenice i sremuša po 1,5 eura, a peršuna 0,5 eura.

Jagode, za koje prodavac navodi da su uvezene iz Grčke, koštaju 4 eura po pakovanju. Kada je riječ o sezonskom voću, dominirale su pomorandže i limuni, po cijeni od 2 eura za kilogram.

Ove nedjelje na risanskoj pijaci u ponudi su bile jezerska i morska riba, dimljeni krap 18, a marinirani 20 eura po kilogramu, veza ukljeve košta 10 eura, dok se kilogram sarduna i bukava prodavao po 5 eura.

Kada je u pitanju ponuda suhomesnatih proizvoda, za kilogram kobasica potrebno je izdvojiti od 12 do 20 eura. Kaštradina se prodaje od 13 do 20 eura po kilogramu, dok je cijena pršuta od 18 do 23 eura po kilogramu.

Domaća jaja koštaju od 0,30 do 0,35 eura po komadu, dok je cijena domaćeg kravljeg mlijeka 2 eura za litru. Na risanskoj pijaci mogu se kupiti i domaći pšenični, heljdin, ražani ili kukuruzni hljeb, čija se cijena kreće od 1,5 eura, a domaći kolači koštaju 8 eura.

U ponudi su bile i sadnice cvijeća po cijeni od oko 2,5 eura.

Tekst i foto: Tamara Vuković