Ekonomija

Pijačni dan u Risnu protiče uobičajenom dinamikom, a kako se može vidjeti na fotografijama koje smo zabilježili rano jutros, bogata ponuda ni ove nedjelje nije izostala.

Dominirali su sezonsko voće i povrće, ali i suhomesnati proizvodi i domaći sirevi.

Kada je riječ o sezonskom voću, na tezgama dominiraju breskve i nektarine, čija se cijena kreće od 3 do 4 eura po kilogramu. Trešnje koštaju od 5 do 8 eura, višnje 5 eura, smokve 8 eura, lubenice 0,7 eura,  dok tegla šumskih jagoda košta 10 eura. 

Boranija je 5 eura, domaća mlada krtola (krompir) 2 eura po kilogramu, dok je za kilogram mrkve (šargarepe) potrebno izdvojiti 2,5 eura, a paprike koštaju od 1,5 -2 eura. Cijena bijelog zelja (kupusa), pamidora (paradajza) i kukumara (krastavaca) iznosi 2 eura po kilogramu, a u ponudi je bila i zelena salata po cijeni od 3,5 eura.

Veza petrusina (peršuna), selena i rukole košta 1 euro, ljekovitog bilja 1,5 eura, dok su mladi luk, blitva i žućenica po 2 eura.

U ponudi su različite vrste sireva, čija se cijena kreće od 8 eura za mladi lisnati sir do 20 eura po kilogramu. Masline koštaju 8 eura, dok je za litar domaćeg maslinovog ulja potrebno izdvojiti od 12 do 15 eura.

Pakovanje od 10 jaja košta 3,5 eura, dok je cijena litra domaćeg soka od malina, kupina, drenjina, nane ili zove 6 eura.

Bogata je i ponuda suhomesnatih proizvoda. Za kilogram pršuta potrebno je izdvojiti 25 eura.

Na risanskoj pijaci mogu se kupiti i pšenični, heljdin, ražani ili kukuruzni hljeb, čija se cijena kreće od 1,2 do 1,7 eura, kao i različiti domaći kolači.

Jutros se u ponudi mogla naći i riba, kao i sadnice različitih vrsta cvijeća.

Tekst i foto: Tamara Vuković