Društvo

Peraštani vjekovima organizuju različite pučke fešte, a kićenje Mađa posebno se obilježava svakog 1. maja, kao simboličan pozdrav proljeću.

Prema tradiciji, mještani su jutros na pjaci ispred crkve Svetog Nikole okitili stablo mladog brijesta flašicama mlijeka i vina, koromanima i raznobojnim trakama.

Ispred organizatora, NVO „Društvo prijatelja grada Perasta“, prisutne je pozdravila predsjednica Marija Brainović.

„Prema viševjekovnoj tradiciji, danas smo podigli Mađ. Riječ je o paganskom običaju koji nagovještava dolazak najljepšeg mjeseca u godini. Stablo kitimo trakama različitih boja, koromanima, kao i flašicama mlijeka i vina, sa željom da nam godina bude plodna i vesela.

Ovaj običaj se nekada obilježavao u 4.30, kada se išlo kod gradonačelnika Perasta. Oni koji su imali stoku donosili su mlijeko, ali su se vremena promijenila, pa se danas Mađ podiže u 8 sati.

Na trgu ostaje do 14. maja, kada ga, u susret Zavjetnom danu Peraštana, uklanjamo. Petnaestog maja obilježavamo dan kada su Peraštani pobijedili mnogobrojnu tursku vojsku i tako odbranili Kotorski zaliv“, kazala je Brainović.

Uslijedio je obilazak Perasta u pratnji mandolinskog orkestra „Škuribanda“, kao i tradicionalno posluženje uz koromane i bijelu kafu u restoranu „Đardin“.

Tekst i foto: Tamara Vuković