Društvo

Centralna, vanjska proslava Svetog Tripuna, zaštitnika grada Kotora i Kotorske biskupije, jedina sačuvana srednjovjekovna vjerska gradska manifestacija na prostoru današnje Crne Gore, održana je danas u svečanom, dostojanstvenom i simboličnom ambijentu, potvrđujući viševjekovni kontinuitet vjere, tradicije i identiteta Bokelja.

Poštovanje Svetog Tripuna započelo je nakon njegove mučeničke smrti u Nikeji, gdje mu je, za vrijeme rimskog cara Decija, suđeno pred prefektom cijele Male Azije Akvilinom. Na pitanje o pripadnosti, mladi Tripun izrekao je ispovijest: „Slobodan sam, a po uvjerenju kršćanin!“. Nakon pogubljenja, njegovo je tijelo preneseno iz Kampsade u Carigrad, a potom u Kotor, gdje se i danas poštuju njegove moći.

Svečanost je započela dočekom podružnica Bokeljske mornarice iz Herceg Novog i Tivta na Pjaci od kina, nakon čega je formiran svečani odred Bokeljske mornarice. 

U pratnji Gradske muzike Kotor kojom je dirigovao Dario Krivokapić, Kulturno-umjetničkog društva iz Marije Bistrice pod dirigentskom palicom Robrta Homena,  te Puhačkog orkestra Fužine, kojim je dirigovao Rudolf Homen svečana povorka uputila se prema Trgu od oružja, gdje su dočekane bratovštine iz Zagreba, Pule, Rijeke i Splita.

Ispred katedrale Svetog Tripuna admiral Bokeljske mornarice Mirko Vičević obavio je smotru mornara, nakon čega je ispaljen počasni plotun, a Bokeljska mornarica izvela je tradicionalno kolo u čast sveca, čin koji se, prema predaji, neprekidno izvodi više od dvanaest vjekova.

Pontifikalno euharistijsko slavlje predvodio je splitsko-makarski nadbiskup i metropolit mons. Zdenko Križić, dok se okupljenima najprije obratio kotorski biskup fra Mladen Vukšić, uputivši snažnu poruku zajedništva, vjere i kontinuiteta.

„S osobitom radošću i zahvalnošću srca upućujem srdačnu dobrodošlicu svima vama, okupljenima oko oltara i našega snažnog zagovornika, mučenika svetog Tripuna, na ovu svečanu proslavu njegova blagdana. Radostan sam što i ove godine zagovor našega nebeskog zaštitnika okuplja vjernike iz Crne Gore, Hrvatske te Bosne i Hercegovine, potvrđujući duboke duhovne, povijesne i kulturne veze koje nas povezuju. Posebno pozdravljam admirala Bokeljske mornarice i malog admirala, zahvaljujući im na vjernosti tradiciji i svjedočanstvu naše bogate baštine“, istakao je na početku.

Splitsko-makarski nadbiskup i metropolit mons. Zdenko Križić poručio je da je Sveti Tripun vjekovima čuvar Kotora i njegovih stanovnika, porodica i pomoraca, ističući da je njegova prisutnost snažno oblikovala identitet grada, njegovu kulturu, muziku i vjeru, bez obzira na to koliko je vjera danas ponekad potisnuta u odnosu na prošla vremena.

„Blagdan Svetog Tripuna nije samo liturgijski dan, već i trenutak duhovne obnove grada. Kroz vjekove se osjećalo da je u središtu ovoga grada bio Isus Hrist. Ako želimo izvući glavnu poruku Svetog Tripuna za nas danas, a posebno za ovaj grad, onda je to poziv da ostanemo vjerni Hristu u izazovima savremenog svijeta“, kazao je nadbiskup. 

Nakon mise, po tradiciji, uslijedila je procesija ulicama Kotora. Moći (mošti) Svetog Tripuna su ispred crkve Sv. Nikole u ime Srpske pravoslavne crkve, pozdravili arhijerejski namjesnik kotorsko-tivatski i paroh kotorski, protojerej-stavrofor Nemanja Krivokapić, protojerej-stavrofor Milenko Jekić, protojerej Predrag Prodić i jerej Vojislav Mijatović. 

Moći sveca pozdravili su i ispred Crnogorske pravoslavne crkve Svetog Petra Cetinjskog Čudotvorca, protojerej Branislav Pajović i jerej Stevo Mašanović.

O značenju današnje proslave govorio je i predsjednik Bokeljske mornarice Kotor mr Denis Vukašinović, istaknuvši istorijski i nematerijalni značaj ove institucije.

„Bokeljska mornarica danas je proslavila Svetoga Tripuna, svoga patrona i zaštitnika. Predaja kazuje da su mornari, po dolasku relikvija u Kotor 809. godine, zaplesali kolo u znak dobrodošlice, kolo koje se danas izvodi po 1217. put. Bokeljska mornarica je nematerijalno kulturno dobro od nacionalnog i međunarodnog značaja, upisano na UNESCO-vu listu 2021. godine. Posebno nas raduje veliki broj mladih i rekordan broj ženskih članica, što potvrđuje da tradicija ima budućnost“, objasnio je Vukašinović. 

Ovogodišnjoj proslavi posebnu svečanost dali su i gosti iz Sinja, Viteško alkarsko društvo, koji su prvi put nakon 1989. godine učestvovali u proslavi. Alkarski vojvoda Mario Sušnjara naglasio je istorijsku povezanost sa Bokeljskom mornaricom. 

„Mi smo Viteško alkarsko društvo iz Sinja, u narodu poznatije kao Sinjska Alka. Naša tradicija traje od 1715. godine i nastala je kao spomen na veliku pobjedu hrvatskog naroda nad Osmanlijama. Već 311 godina Alka živi u svom punom obliku i predstavlja spoj viteštva, identiteta i snažne kulturne baštine. Kroz povijest smo snažno povezani s Bokeljskom mornaricom. Postojali su brojni kontakti, zajedničke inicijative i susreti, a nama je iznimna čast što smo se danas odazvali pozivu i sudjelovali u proslavi vanjske procesije svetog Tripuna. Ovo za nas nije samo gostovanje, nego nastavak jednog prijateljstva i tradicije koja se gradila desetljećima. Predstavnici Bokeljske mornarice bili su naši gosti u Sinju prošle godine, a današnji dolazak u Kotor vidimo kao nastavak tog lijepog kontinuiteta’’,  naglasio je Šušnjara.

Euharistijskom slavlju i svečanoj procesiji prisustvovali su brojni visoki crkveni dostojanstvenici, među kojima su bili mons. Zdenko Križić, nadbiskup splitsko-makarski i metropolit, mons. Roko Đonlešaj, nadbiskup barski, mons. Milan Zgrablić, nadbiskup zadarski, mons. Marin Barišić, splitsko-makarski nadbiskup u miru, mons. Roko Glasnović, dubrovački biskup, mons. Tomislav Rogić, šibenski biskup, mons. Ranko Vidović, hvarski biskup, mons. Petar Palić, mostarsko-duvanjski i trebinjsko-mrkanski biskup, mons. Ilija Janjić, biskup u miru.

Uz njih su učestvovali i preč. Tomica Šestak, rektor Hrvatskog nacionalnog svetišta Marija Bistrica, don Toni Šinković, župnik Sv. Roka Jesenice, brojni svećenici, redovnici i redovnice koji su pristigli s hodočasnicima.

Među državnim i političkim zvanicima bili su Davor Božinović, potpredsjednik Vlade Republike Hrvatske i ministar unutarnjih poslova sa suprugom, Jasminka Lončarević, generalna konzulica Republike Hrvatske u Crnoj Gori, Boris Belanić, opunomoćeni ministar Veleposlanstva Republike Hrvatske, Vladimir Jokić, predsjednik Opšine Kotor, Vojin Batuta, predsjednik Skupštine opštine Kotor, Josip Milički, načelnik Općine Marija Bistrica, Dobrila Vlahović, generalna direktorica Direktorata za kulturnu baštinu Ministarstva kulture i medija Crne Gore, ujedno izaslanica ministrice Tamare Vujović.

Svečanosti su prisustvovali i Adrijan Vuksanović, predsjednik Hrvatske građanske inicijative, Zvonko Deković, predsjednik Hrvatskog nacionalnog vijeća Crne Gore, Marija Mihaliček, predsjednica Ogranka Matice hrvatske u Kotoru, Danijela Petrović-Jablan u ime Hrvatskog građanskog društva Kotor, Zrinka Velić u ime HKD „Tomislav“ Kotor, Nada Baldić, ispred Hrvatske kulturne udruge (HKU) Stađuni od kulture, kao i brojni predstavnici kulturnih, društvenih i vjerskih institucija.

Uskoro opširnije u video prilogu Radio Kotora…..

Mihaela Moškov