Društvo

Danas se proslavlja sv. Tripun, zaštitnik Kotora, čiji je kult 1.211 godina prisutan na ovim prostorima. 

Rođen je u gradu Kampsadi (Mala Azija) u tadašnjoj rimskoj provinciji Apamei, u hrišćanskoj porodici. 

Po predanju, poštovanje sveca započelo je nakon mučeničke smrti u Niceji, gdje mu je suđeno pred prefektom cijele Male Azije Akvilinom (za vrijeme vladavine rimskog imperatora Decija). 

Nakon suđenja odrubljena mu je glava. 

Tijelo sv. Tripuna, nakon smrti, preneseno je u Kampsadu, odatle u Carigrad, a iz Carigrada u Kotor. 

Danas-na Tripundan, počasnu stražu pored njegovih moštiju drže mornari-kopljanici. 

U okviru proslave svetog Tripuna danas su u katedrali u Starom gradu dvije svete mise: u 10 i u 18 sati, saopšteno je iz Kotorske biskupije. 

Večernju misu predvodiće kotorski biskup, monsinjor Ivan Štironja.

 Vanjska proslava ove godine, zbog epidemioloških razloga, održaće se bez procesije, u nedjelju 6. februara. 

Za 9 i 30 planiran je doček podružnica Bokeljske mornarice ispred glavnih gradskih vrata. 

U 10 sati na trgu ispred katedrale Bokeljska mornarica će izvesti kolo sv. Tripuna.

 Svečanu pontifikalnu misu će od 10 i 30 služiti monsinjor, dr Tomo Vukšić, vrhbosanski nadbiskup koadjutor i apostolski upravitelj Vojnoga ordinarijata u Bosni i Hercegovini.