Arhiva

Milena Dravić (78), legendarna jugoslovenska glumica, preminula je noćas u Beogradu poslije teške bolesti u Kliničko-bolničkom centru "Bežanijska kosa"- potvrđeno je u Udruženju dramskih umjetnika Srbije.

Filmska, televizijska i pozorišna glumica Milena Dravić, od svoga prvog filma "Vrata ostaju otvorena" koji je kao tinejdžerka 1959. snimila pod rediteljskom palicom pokojnog Františeka Čapa, češkoga emigranta izrasla je u miljenicu gledalaca. Svojim šarmom i spontanošću se nametnula, pa ubrzo snima i brojne druge filmove.

Motivisana uspjehom koji je do tada postigla upisuje Akademiju za film, pozorište, radio i televiziju. Kada za svoju šestu ulogu seoske djevojke, koja kao prekobrojna, kreće za momkom na radnu akciju u "Prekobrojnoj" (1962), reditelja Branka Bauera, osvaja "Zlatnu arenu" na festivalu u Puli, postalo je jasno, da je jugoslovenska kinematografija dobila izuzetnu glumačku ličnost.

Od tada, sarađujući sa više od 30 reditelja svih generacija, neprekidno igra uglavnom glavne uloge u više od 50 filmova najrazličitijih žanrova, postavši jednim od glumačkih postulata srpske kinematografije, iako je često igrala i u drugim sredinama. Svoju drugu "Zlatnu arenu" dobija za ulogu krojačice koja se pridružuje partizanskome biciklističkom bataljonu u "Biciklistima" (Puriša Đorđević), 1970.(Foto - internet)

Iako je u nizu filmova uspješno igrala dramske uloge, u ulogama sa elementima komedije je došla do punog izražaja, posebno u jednoj od najboljih zabavnih televizijskih emisija u Jugoslaviji "Obraz uz obraz" TV Beograd. Uspješno je igrala i u velikom broju televizijskih serija i drama, a okušala se i u pozorištu, i to uglavnom u neformalnim, alternativnim grupama, te i u "Ateljeu 212". Debituje u pozorištu "Atelje 212" u Beogradu sa ulogom u komadu Bore Ćosića 1971. godine u predstavi

"Uloga moje porodice u svjetskoj revoluciji", a od tada se pozorišne uloge samo nižu.

Milena Dravić i Dragan Gaga Nikolić bili su jedan od omiljenih slavnih parova u bivšoj Jugolaviji. Bili su u braku 45 godina, a slavna glumica je prije Gage imala još dva braka.

Prvi brak je sklopila sa rediteljem Purišom Đorđevićem, a vjenčali su se 1960. godine. Od 1967. do 1969. bila je u braku sa rediteljem Kokanom Rakonjcem.

Ovog ljeta je boravila u Puli, Herceg Novom i na Paliću, gdje je promovisana monografija o njoj. Na ovim prostorima jedini je dobitnik glumačke nagrade na prestižnom Kanskom festivalu, koja joj je pripala za ulogu u filmu "Poseban tretman" Gorana Paskaljevića, po scenariju Duška Kovačevića.

Dobitnik je niza najprestižnijih nagrada među kojima su "Zlatna ruža" na festivalu u Veneciji, "Zlatna Haridba" na festivalu u Taormini , "Zlatni laćeno" u Avelinu, "Dobričin prsten", "Pavle Vuisić", "Statueta Joakim Vujić", "Zlatni pečat" Jugoslovenske kinoteke, "Beogradski pobjednik" i druge.

Među nagradama koje dodeljuju mediji izdvaja se priznanje "Večernjih novosti" - "Glumica vijeka" (uz Miru Stupicu).