Arhiva

Pozorišna predstava za djecu Gradskog pozorišta „Kod Nojeve barke u osam" (5+), biće odigrana danas u 17 sati, u Velikoj sali Centra za kulturu Tivat.

Po tekstu savremenog njemačkog autora Urliha Huba predstavu je režirao Robert Valtl. I ova predstava je dio novembarskih dana kulture čiji je pokrovitelj Opština Tivat.

Zabavna i poučna priča o biblijskom Potopu, ujedno je i himna prijateljstva, solidarnosti i tolerancije. Rafiniranog stila, sa puno humora, katkad i vesele burleske, tekst se posljednjih godina afirmisao kao najveće evropsko otkriće za najmlađu publiku. Junaci predstave su tri pingvina koji su spletom okolnosti, putem goluba, dobili vijest o Potopu koji će zadesiti planetu. Tu je, naravno i Noje, starac sa dugom sijedom bradom, koji se u osam sati uveče sprema da na barku ukrca po dva predstavnika od svake žive vrste, kako bi negdje daleko izgradio novi i bolji svijet. Dva prijatelja pingvina ne žele da ostave trećeg, najmlađeg, i domišljato ga u koferu ukrcavaju na barku punu životinja.

Uloge tumače: Slaviša Grubiša, Smiljana Martinović, Goran Slavić, Branko Ilić i Sejfo Seferović.